Huntsville, TX

بسم الله الرحمن الرحيم
بما أن لي سنة في المدينة راح أكتب تقيمي لها و راح أحاول أغطي أكثر الجوانب المهمة اللي تهم أي واحد يفكر يجي. راح أحاول أكتب بشكل مبسط، لكن يشمل العديد من التفاصيل للفائدة.

مدينة هانتسفيل مدينة معروفة بثلاث نقاط مهمة. أولا أنها مدينة تحوي العديد من السجون، ثانيا أنها المدينة اللي الولاية تنفذ فيها حكم الإعدام، ثالثا واللي يهمنا وجود الجامعة فيها. قد يتبادر للذهن ان المدينة غير آمنة لوجود السجون ولكن الحاصل هو العكس تماما! وذلك لأن الوجود الهائل للسجون أدى لحضور هائل من الشرطة من أقسام متعددة و مستويات متعددة. في النادر إن الواحد يسمع عن جريمة او مشكلة حصلت. أنا شخصيا نسيت مفاتيحي على الباب الخارجي للشقة مرتين و الحمد لله ما حصل أي شيء. في سنة واحدة ما سمعنا عن مداهمات سرقة إلا مرة واحدة عن طريق ناس قالوا إن ناس قالت والله أعلم بصحة الكلام و لكن الحمد لله المدينة آمنة جدا. قسم شرطة الجامعة يوفر توصيل من الجامعة إلى البيت في حال الواحد كان خايف على نفسه، على مدار الساعة. هذا بالنسبة للأمان.

أسعار السكن جدا مناسبة، تتراوح من بين 500-800 زائد الفواتير. بعض المجمعات تدفع عنك الموية و جزء من فاتورة الكهرباء، و أحيانا النت يكون شابك و جزء من سعر السكن. أحيانا نسمع عن بعض المجمعات ان إداراتهم سيئة لكن أنا شخصيا المجمع اللي ساكن فيه كويسين. المشكلة الوحيدة في السكن في هانتسفل إن المجمعات مكتظة و لازم تحاول في أبدر وقت إنك تلقى سكن عشان ما يقولون لك والله آسفين مليانين عندنا. بالنسبة لسكن الجامعة لا ينصح فيه بشكل عام. فيه مستويات لسكن الجامعة لكن أنا زرت واحد فيهم (ليس الأفضل) و كان في حالة رديئة جدا. شخصين يتشاركون في غرفة واحدة صغيرة و أحيانا غرفتين (يعني 4 أشخاص) يتشاركون نفس الحمام و أنتم بكرامة. بالنسبة للتنقل من موقع سكنك إلى الجامعة مافيه إلا مشيا على الأقدام أو سيارتك و لكن بعض المجمعات توفر لك باص يتحرك من المجمع اللي إنتا فيه إلى الجامعة حلى حسب جدول موضوع من قبل إدارة المجمع.

الخدمات الترفيهية محدودة في هانتسفيل. الجامعة فيها نادي للتسلية و بعد كل فترة الجامعة تنظم دورات أو محاضرات أو فعاليات للتسلية. الحضور الرياضي جيد حقيقة ( ناس تلعب كرة قدم و كرة قدم أمريكية و فرسبي و سلة) الجامعة تشارك في دوري الولايات المتحدة الأمريكية لكرة القدم الأمريكية على مستوى الجامعات. إذا إنك راعي رياضة ممكن تحصل ناس تشاركك. للناس اللي تعشق ألعاب الكروت يوجد نادي صغير لناس لها هالهواية. لو إنك راعي نايت كلبات ممكن تلقى اللي يعجبك، لكن أعانك الله على هذا الطريق. أعتقد يوجد في هذه المدينة الصغيرة 2-3 نايت كلبات أنا شخصيا ما زرتهم لأنها -مو جوي- فما أقدر أقولك هي كويسة أو لا. لكن في الحقيقة أجمل شيء بالنسبة للترفيه إن الجامعة كل سنة لها حفلتين كبيرة، سواء كانت حفلات موسيقية لنجوم كبار أو حفلات -ستاند أب كوميدي- سعة صدر و فلة، لكن انها مرة أو مرتين سنويا. لو ما لقيت اللي تبغاه في هانتسفل، اضرب ساعة مشوار لهيوستن و راح تلقاه هناك بالتأكيد

المناخ. تكساس جوها يشابه جو السعودية بشكل كبير، ما أتوقع راح تحس بالفرق الشاسع في المناخ. أنا شخصيا من سكان أهل الرياض، الجو هنا و هناك حار صيفا بارد شتاء. و طبعا لابد إن تجيك أيام الأربع فصول في يوم واحد, نفس السعودية.

بالنسبة للموقع هانتسفيل مدينة في رأيي تقع في مكان استراتيجي في تكساس. قريبة من أهم مدن أمريكا خصوصا هيوستن. أوستن و دالاس و سان أنتونيو مو بعيدة أبدا. كلها توصلها بالسيارة بكل أريحية. السفر دائما عن طريق مطار هيوستن.

نقاط أخرى عن المدينة، المدينة صغيرة جدا و التنقل فيها لابد من وجود السيارة لعدم توفر التكاسي العامة (يوجد فقط 2-3 تكاسي في المدينة) ولا المواصلات العامة. بالنسبة للأكل فيه مطاعم كثير في المدينة و العديد من السوبر ماركتات الأمريكية الكبيرة مثل Walmart, Target, HEB و غيرها و المدينة في تطور مستمر و سريع، دايما فيه أماكن جديدة و محلات تفتح.

أنا مستعد أرد على أي استفسار و أساعد أي أحد حاب يجي هانتسفيل حتى لو أستقبله من المطار بنفسي.. الناس للناس ما لنا إلا ربنا ثم بعض.

للتواصل 0565146126 من السعودية أو 7136324786 من أمريكا..

أتمنى إن هالنبذة البسيطة تكون فادت ولو شخص واحد.. و الله الموفق.

مدينه دراسية بحته

هيا مدينة صغيرة و جامعية الجو العام للمدينة تنفع للدراسة

لا يوجد فيها اي وسائل ترفيه لاكن ما يميزها انها قريبة من جميع المدن الكبيره زي هيوستن و اوستن و دلاس و سان انطونيو يعني هيا في الوسط و موقعها حلو

بصراحة معهد اللغة فيه تخبطات ادارية و المدرسين فيه عجائز ومن ناحيتي ما انصح احد يدرس فسة

جوها نفس جو تكساس حار في الصيف بارد في الشتاء

اما بالنسبة للامان امنة جدا